Казан

Татарстанның меңъеллык тарихлы башкаласы бай мәдәни тормыш белән яши. Ел саен Казанда данлыклы халыкара фестивальләр уза: Ф.И.Шаляпин исемендәге халыкара опера фестивале, Р.Нуриев исемендәге классик балет фестивале, С.В.Рахманинов исемендәге «Ак сирень» фестивале, «Алтын көз» open-air фестивале, Tat Cult Fest яңа татар мәдәнияты фестивале, «Тәмле Казан» фестивале, «Аксёнов-фест» әдәбият фестивале һәм Халыкара мөселман кинофестивале. Казанда 9 театр, 34 дәүләт музее, хосусый галереялар, С.Сәйдәшев исемендәге Дәүләт Зур концерт залы һәм 2 филармония эшли.

Шәһәрдә яңа тораклар, социаль, сәнәгать һәм спорт объектлары, юллар һәм метрополитен линияләре төзелә. Икътисад инновацион юнәлештә үсә, шәһәр территориясендә Европада иң зур технопаркларның берсе – «Идея» һәм Россиядә иң зур булган мәгълүмати технологияләр паркы «IT Park» эшли. Казан янында яңа гасыр Россиядә төзелгән беренче шәһәр – Иннополис урнашкан. Шул ук исемдәге университет белән берлектә ул киләчәктә мәгълүмати технологияләр өлкәсендә әйдәп баручы үзәк булыр дип көтелә.

2009 елда Казан Россиянең спорт башкаласы исеменә лаек булды. Шәһәр бу исемне абруй һәм горурлык белән йортеп, шулай ук халыкара дәрәҗәдәге ярышларда ышанычлы чыгыш ясаучы күп кенә титуллы спортчылар һәм спорт клубларының өе булып тора. «Рубин» футбол клубы, «Ак Барс» хоккей клубы, «Зенит» һәм «Динамо» волейбол клублары, УНИКС баскетбол клубы, «Синтез» су тубы (ватерполо) клублары – бу спорт йолдызларының даны Россиягә генә түгел, бөтен дөньяга таралган.

2013 елда Казан XXVII Бөтендөнья җәйге универсиада ярышларын кабул итте. 27 спорт төре буенча уздырылган ярышларда 10 меңнән артык спортчы катнашты. 2015 елның җәендә Казан Су спорт төрләре буенча ФИНА дөнья чемпионатын уздырды. 2017 елда Мәскәү, Санкт-Петербург һәм Сочи белән беррәттән FIFAның Конфедерацияләр кубогы матчларын уздырды, ә 2018 елда Россиянең 11 шәһәре белән рәттән FIFAның футбол буенча дөнья чемпионаты матчларын кабул итте. Титуллы халыкара спорт ярышлары уздыруының югары сыйфаты дөньякүләм спорт җәмәгатьчелеге тарафыннан билгеләнде.

Казанның статуслы спорт чараларын оештыру өлкәсендәге казанышлары дәрәҗәле премияләр кысаларында берничә тапкыр билгеләп үтелде. 2013 елның 6 ноябрендә Лондонда 7 нче International Sports Event Management Awards-2013 (ISEM) исмеле Халыкара спорт менеджмент өлкәсендәге казанышлар өчен тапшырылу премиясе тантанасы кысаларында Казан «халыкара спорт чараларын уздыру өчен дөньяда иң тәкъдим ителгән урын» номинациясендә җиңде. 2014 елда Төркиянең Белек шәһәрендә SportAccord Халыкара конвенциясендә «SportBusiness International» журналы Татарстан башкаласын «Ел ачылышы» номинациясендә җиңүче итеп иглан итте.

Казан бүген Россиядә туристлар иң яратып йөри торган шәһәрләрнең берсе. 2019 елда гына Татарстан башкаласына 3,5 млн. кеше килгән. Хәзерге вакытта шәһәрдә 150дән артык урнаштыру берәмлекләре эшли. Архитектура объектларын актив реставрацияләү, яңа ял итү һәм яр буйларын ачу, шәһәр парклар үстерүенең яңа концепциясен гамәлгә ашыру һәм күп санда мәдәни, спорт һәм башка зур чаралар уздыру шәһәргә чәчәк ата торган мегаполисның тулы һәм җәлеп итүчән кыяфәтен тәэмин итте; моны, һичшиксез, казанлылар да, башкала кунаклары да билгеләп үтә.

Казан – Россиянең төп студентлар шәһәрләренең берсе. Биредә 67 илдән 200 меңгә якын студент белем ала. Шәһәрдә Россиянең иң зур югары уку йортларыннан булган Казан (Идел буе) федераль университеты, А.Н.Туполев исемендәге Казан милли тикшеренү техник университеты һәм Казан милли тикшеренү технологик университетлары урнашкан.